Un organizaire dels Jòcs Olimpics de Londres ordenèt ièr a de suportaires de la caiaquista basca Maialen Chourraut, que retirèssen lo drapèl basc que mostravan. L’esportiva basca ganhèt ça que la lo bronze dins la modalitat d’aigas vivas.
 
Es pas lo primièr còp que l’organizacion dels jòcs fa retirar una bandièra. La polemica comencèt diluns quand l’organizacion dels Jòcs obliguèt lo paire d’una jogaira d’escondre una bandièra bretona, jos menaça d’èsser fòrabandit. E ara s’es tornat passar amb l’ikurrina, lo drapèl basc. Tot aquò perque l’organizacion dels Jòcs Olimpics d’ongan a decidit que sonque se pòdon mostrar de bandièras dels estats qu’i participan.